Descrizion

Eduka2 - Par un guvier transfrontalîr de istruzion al è un progjet, finanziât dentri dal Program di Cooperazion Interreg V-A Italie-Slovenie 2014-2020 cul Font european di svilup regjonâl.

Il progjet EDUKA2 al fronte la sfide comun de debile capacitât di cooperazion transfrontaliere tal setôr de istruzion. L'obietîf gjenerâl dal progjet al è il rinfuarciment di cheste capacitât, dant une man pal cambiament de situazion di cumò par mieç de creazion di imprescj di guvier comuns e di modei didatics e formatîf condividûts.

A zovâsi des azions previodudis a saran soredut lis scuelis e lis universitâts te aree dal Program par mieç di trê prodots. Il prin al è leât ae creazion di un Document strategjic di modei didatics condividûts cun liniis vuide, metodis in comun e contignûts condividûts sedi su argoments culturâi e lenghistics, sedi ambientâi e naturalistics che al vignarà inmaneât da une Rêt di cooperazion transfrontaliere formade di scuelis, universitâts, centris di ricercje e ents da lis minorancis nazionâi e lenghistichis. Il secont al previôt la realizazion di une formazion condividude par docents che e puartarà indenant il trasferiment dai modei didatics nomenâts prime tal contest scuelastic e universitari. Il tierç prodot al rivuarde la predisposizion di un Document strategjic condividût jenfri lis universitâts e chei che a àn interès par une plui facil gjestion des pratichis aministrativis di ricognossiment dai titui e des cualifichis professionâi par students e laureâts transfrontalîrs tal setôr de istruzion, previodint la creazion di materiâi e servizis di supuart aes universitâts e une formazion contestuâl dai operadôrs. Il svicinament di “rêt” jenfri docents scuelastics e universitaris, ricercjadôrs e operadôrs proponût dal progjet al è indispensabil par rinfuarçâ la cooperazion transfrontaliere tal setôr di riferiment, proponint di meti dongje lis cognossincis teorichis gnovis e lis esperiencis “sul cjamp” svilupadis in ducj e doi i Paîs. Il progjet al è ancje origjinâl e inovatîf sot il profîl de difusion des tecnologjiis tal setôr de istruzion, promovint il doprâ materiâi didatics in linie e e-learning.

I principâi destinataris dal progjet a son:

  • scuelis de infanzie, primarie e secondarie in Italie e in Slovenie; 
  • dirigjents e docents scuelastics, arlêfs, students;
  • universitâts, ancje lis segretariis dai arlêfs, lis segretariis didatichis e i centris di orientament;
  • students universitaris e students transfrontalîrs in dissiplinis cun prospetivis professionâi tal setôr de istruzion;
  • centris di ricercje;
  • ricercjadôrs, docents universitaris e esperts che a stan daûr di istruzion e didatiche;
  • organisims des minorancis nazionâi e lenghistichis; 
  • organisims e associazions tal setôr de formazion, formadôrs, operadôrs didatics;
  • fameis cui fîs che a son dentri tal procès formatîf; 
  • rapresentants istituzionâi, politics e organisims publics e privâts che a stan daûr de istruzion;
  • media locâi e nazionâi;
  • rivistis sientifichis che a stan daûr di istruzion, didatiche, lenghis, diversitât culturâl e lenghistiche.

Il progjet al è tacât ai 1 di Setembar dal 2017 e al si sierarà ai 30 di Avril dal 2019.

Lis ativitâts proviodudis a varan lûc ta lis provinciis di Triest, Gurize, Udin, Vignesie in Italie e tes Regjons statistichis Obalno-kraška, Osrednjeslovenska e Goriška in Slovenie.

Il cost totâl dal progjet ametût a finanziament al è di 775.500,00 €.