La struture gjenerâl dal progjet si articole in trê pachets di lavôrs (work package - WP), che a son definîts da un intun di risultâts e prodots e des ativitâts che a coventin par cjapâju:
- WP1 – Gjestion dal progjet
- WP2 – Ativitâts di comunicazion
- WP3 – Implementazion
Massime il WP3 al si articole in chest mût:
WP3.1 RÊT DI COOPERAZION TRANSFRONTALIERE E DOCUMENT STRATEGJIC COMUN DI MODEI DIDATICS CONDIVIDÛTS
L'obietîf dal WP3.1 al è chel di creâ un document strategjic comun di modei didatics comuns jenfri i sistemis d'istruzion inte aree dal Program, cun liniis vuide, metodis comuns e contignûts condividûts di didatiche transfrontaliere, didatiche des lenghis minoritariis, regjonâi e dal vicin e didatiche sui pericui leâts al sfrutament dal teren e al cambiament climatic. Chest al ven fat da une Rêt di cooperazion transfrontaliere tra scuelis, universitâts, centris di ricercje e ents di riferiment des minorancis nazionâi e lenghistichis (slovene e furlane in Italie, taliane in Slovenie). Dentri de Rêt a lavorin 16 grups di lavôr, che 10 a son transfrontalîrs e fats di docents e ricercjadôrs che a stan daûr la creazion di materiâi didatics e la realizazion di azions pilote par promovi la partecipazion e la capacitât di costruzion dal disot.
WP3.2 CORS DI FORMAZION COMUNS PAR DOCENTS DES SCUELIS PUBLICHIS TE AREE DAL PROGRAM
L’obietîf dal WP3.2 al è chel di inmaneâ un percors di formazion comun par docents des scuelis publichis te aree dal Program su la didatiche transfrontaliere e su la didatiche des lenghis minoritariis, regjonâi e di chel dongje, tignint dentri ancje la tematiche dai pericui leâts al sfrutament dal teren e al cambiament climatic. Par mieç dai cors di formazion lis cognossincis a vignaran trasferidis e a saran proponûts i modei didatics che a son dentri dal Document strategjic comun di modei didatics condividûts jenfri i sistemis d’istruzion te aree dal Program fat de Rêt.
5 a son i percors di formazion inmaneâts:
- su la didatiche transfrontaliere e sul doprâ in classe i imprescj didatics sul teme des classis transfrontalieris e de leterature de comunitât minoritarie te aree transfrontaliere;
- sul insegnament de lenghe slovene par docents des scuelis cun lenghe d’insegnament slovene in Italie;
- sul insegnament de lenghe taliane par docents des scuelis cun lenghe d’insegnament taliane in Slovenie;
- su la didatiche pe promozion de lenghe furlane in contest di insegnament dissiplinârs;
- su la didatiche dal contat e insegnament de lenghe di chel dongje.
WP3.3 SUPUART A STUDENTS E LAUREÂTS TES PROCEDURIS PAL RICOGNOSSIMENT DAI TITUI E DES CUALIFICHIS PROFESSIONÂI CUISTADIS TAL PAÎS DONGJE, SOREDUT TAL SETÔR DE ISTRUZION
Il WP3.3 al cjape dentri ativitâts di supuart ae realizazion di un spazi comun transfrontalîr di formazion e lavôr, soredut par insegnants. Te aree dal Program al è comun che i zovins, soredut chei des minorancis lenghistichis, a sielzin un percors di studi o di lavôr tal Paîs dongje. Lis ativitâts previodudis a àn chê di promovi une plui grande informazion su lis proceduris pal ricognossiment dai titui e des cualifichis professionâi par rindi plui facil il jentrâ ai zovins che a stan te aree dal Program tal sisteme di formazion universitarie e dal marcjâ dal lavôr di un o chel altri Paîs.
Il WP3.3 al si svilupe in cuatri ativitâts che a metaran in vore:
- un manuâl indreçât ai students che a decidaran di scomençâ o che a àn bielzà scomençâ un percors di studi tal Stât dongje;
- un program condividût pe formazion dal personâl tecnic impleât aes segretariis students, ai uficis che a stan daûr al orientament e al tutorât, a altri personâl des universitâts te suaze transfrontaliere e di altris sogjets o interessâts;
- un model base di orientament pai students universitaris transfrontalîrs cuntune schirie di ativitâts di supuart e orientament prime, dulinvie e daspò la conclusion dal percors di studi;
- un document strategjic comun cuntune descrizion condividude des pratichis di ricognossiment dai titui e des cualifichis soredut pe profession di insegnant e di altris profîi someants che a vignaran firmâts des universitâts e facoltâts bielzà dentri tal parternariât dal progjet, e ancje da altris interessâts.