Predstavitev
Inmaneâ un model transfrontalîr tai cjamps de istruzion, formazion e ricercje academiche, fasint de frontiere jenfri Italie e Slovenie une oportunitât di cressite culturâl. Al è chest ce che si propon di fâ il progjet european "Eduka2 - Per una governance transfrontaliera dell’istruzione", disvilupât tal ambit dal Program di Cooperazion Interreg V-A Italie-Slovenie e tignût sù ancje dal Font European di Svilup Regjonâl.
Presentât ai 12 di Otubar a Triest, il progjet al durarà un an e mieç, puartant indenant lis ativitâts inviadis cul prin progjet Eduka e pontant a rinfuarçâ la colaborazion transfrontaliere tal ambit de istruzion cu la creazion di struments di didatiche e modei formatîfs condividûts, soredut tai istitûts scuelastics e ta lis universitâts dal Friûl Vignesie Julie e de Slovenie. Lis ativitâts proviodudis, di fat, a varan lûc ta lis provinciis di Triest, Gurize, Udin e Vignesie e ta lis Regjons statistichis Obalno-kraška, Osrednjeslovenska e Goriška in Slovenie. Struments e iniziativis a son indreçâts a dut l’arc formatîf, de scuele de infanzie ae universitât.